نستذكر المجد ومعزي أخو نورة

بثلاث وعشرين من سبتمبر الجاري
نستذكر المجد ومعزي أخو نوره
حلمه وطن واستعان بربه الباري
واستذكر اجداده الحكام وجا دوره
جهّز رجاله وسيفه بالدجى ساري
وسبره يقول الرياض بشوق مسروره
واقبل ونادى يا قصر الحكم ياداري
نرجع نحكمك بشرع الله ودستوره
بثلاث وستين قرماً سيفهم عاري
يمشون طاعة لابو تركي بطابوره
في خامس أيام شوال انبرى منادي
الحكم لله ثم لمعزي وشوره
ويوم استعاد الديار بعزم واصراري
تطمنت دار عشر سنين مذعوره
قبله سباريت نجد وذيبها عاوي
وبعده لو الليل غدرا امنها نوره
عبدالعزيز الزعيم الفيصلي ضاري
على المصايب وفعله قال مكبوره
عدله شراع الامان وحزمه الصاري
مركب وطنا مشى بقيادة صقوره
من حل الامن وظلام الجهل متواري
وبالحلم والحزم يد الشر مدحوره
هذا السعودي بفخره للوطن شاري
وقلوبهم نور غاض الليل وديجوره
عبدالعزيز ان ذكرنا حي هالطاري
وحّد بلاده براية حق منصوره
ويمر يوم الوطن كل عام ونماري
بحكم رشيد كتب بالشرع دستوره
والشعر ليته بقافة يسبر اغواري
ينثر بمسك المشاعر افخم اعطوره