خضّي صميلٍ فيه درٍّ من نعاج ومن ضرع عنزٍ توّ طازج ومحلوب

كنّكْ يا بنتِ الناسِ وِدِّكْ تسْألين
عنْ حاجِةٍ كانتْ مهمّهْ في زمَن
عنْ قِرْبَةِ الْمَاء في زمانِ الأولين
اللي يسمّيها البَعَضْ باسْمِ السّعن
ثلاجةِ الماء في حياةِ الطيّبين
وفيها البَعَضْ كانوا يخضّونِ اللبَن
أدّتْ غرضْها في عسِيرَاتِ السنين
ذكرى جميله من تراث أرضِ الوطن
ناصر جمعان آل عوض - وادي الدواسر
خضّي صميلٍ فيه درٍّ من نعاج
ومن ضرع عنزٍ توّ طازج ومحلوب
مرفوع في محجان معلق بسباج
على ثلاث اعواد في الارض منصوب
كلش طبيعي فاللبن شرب وإنتاج
مستخلصين الزبد وسمن مع الروب
سعود عبدالعزيز الهزاع - نعام
يا وقت ياللي قفت أيام عجلات
راحت ولكن باقي الذكرياتي
يوم البدو بالبر صولات جولات
ودلالهم فوق الجمر مبهراتي
وبنت البدو خضت صميل الجمالات
صميل طعمه فيه زين الحلاتي
خالد ناصر المخيمر - روضة سدير
يا منظر شفته على وضع تذكار
من الحضاره خالد مدة سنين
مجد التراث مسطرينه الأحرار
ناس لهم طولات في كل حين
يا بنت لبسك كنه الوقت لا دار
يزهاك وانتي زاهيه منظر العين
حمد عبدالله الوايلي - حوطة سدير
بين الطبيعة جالسه بالمكاني
ذكرى من الماضي وصوره جميله
صميل من وقتٍ مضى من زماني
يوم البساطة والموارد قليله
سطام المسردي - الرياض
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد