طفلة صغيرة تهدي التمر للضيف .. تمرٍ نظيف.. ومصدره سكريّه

طفلة صغيرة تهدي التمر للضيف
تمرٍ نظيف.. ومصدره سكريّه
أهل الكرم يندون بالبرد والصيف
وكفو فهم لضيوفهم حاضريّه
على الرشيد - رياض الخبراء
بنتٍ جميلة عندها التمر موجود
فيها من الذكرى تذكر بالأجداد
الخير واجد نحمد الله في زود
في نعمةٍ يالله عسى الخير يزداد
محمد عبدالعزيز الخنيفر - أشيقر
الطفلة اللي لابسه ثوب محشوم
أمن التراث اللي مضى فيه وسمي
من فوق زلٍّ قدمت تمر مهضوم
من بيت ما تجهل عليه السلومي
محمد عبدالله الشهري - أبها
صورة جميلة ما بقى غير الكلام
زوليةٍ والتمر مع حسن الطفوله
الزّل لوحه جميلة يا سلام
وتمرٍ أمام البنت في أوَّل حلوله
سعود عائش الحربي - جدة
فيها البراءة شكلها بنت الأجواد
والثوب لايق حيل له جاذبيّه
سبحان من صورك من بين الأفراد
وكمّل جمالك بالحلا يا السعوديّه
خالد ناصر المخيمر - روضة سدير
يا طفلةٍ منْ هُوْ نظَرْها تأسره
يحفَظْكِ ربّ الكونِ منْ شرِّ الْمَلا
التمر بينِ يْديكِ ما أحلى منظره
من يدْكِ كلٍّ يشتهيهِ وْيأكلا
ناصر جمعان آل عوض - وادي الدواسر
يا بنت ياللي تلبسين القديمي
ثمٍ جلستي فوق زلٍّ حريري
تقلبين التمر نوع القصيمي
تراث ماضي ما يبيله خبيري
حمد عبدالله الوايلي - حوطة سدير
ترى التمر يا ناس يجلب سعاده
وهذي البنيّه بشوفته هي سعيده
في سلمها الموجود تلقى إشاده
تبحث عن اللي يا جماعه يفيده
ريان محمد الخنيفر
زبيل بالتمر أشوفه حيل ملياني
قدوعٍ لنا خيرات وفراش زويليه
ذكرت وقتٍ مضى عهدٍ لجداني
يوم أنهم ما بين حرفي ورجليّه
صالح البشري
نرحب بمشاركاتكم الشّعرية على ألا تتجاوز بيتين،
وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد