نَقلَه كبيره لِلمُزارع كمَا العيد اختَصرت جهُودٍ ووَقْتٍ كِثيري

هذي بلاكستون ياللي تعرفون
وحذافها بالسير يطوون فوقه
صوت المكينه ياصل اللي يروسون
وطرمبة الما تجذبه ثم تسوقه
سليمان عبدالعزيز السنيدي - الرياض
جاتِ البِلَاكستون بعْد المَعَاوِيد
واصبحْ بهَا ريّ المزارع يسِيري
نَقلَه كبيره لِلمُزارع كمَا العيد
اختَصرت جهُودٍ ووَقْتٍ كِثيري
ناصر جمعان آل عوض - وادي الدواسر
هذا المكينة واضح انها قديمه
في يوم من ليام قد كان له دور
في خدمة اللي ورده بالعزيمه
يخدم محل السانية بعد والثور
محمد عبدالله الشهري - أبها
آلة قديمة ابلاكستون
أتطلع المي من بيره
عقب السواني ورفع الحون
جتنا المكان بها خيره
على الرشيد - رياض الخبراء
الله على اللي صوتها ينعش الروح
قفت بها الأيام عصراً قديمي
يا ما جنى الفلاح خيراً ومصلوح
ومع غرسته للعزّ دايم يرومي
خالد ناصر المخيمر - روضة سدير
ياما اشتغلتي يالمكينه على البير
تسقين غرسٍ ومن سكن داخل الحي
تدفع مياهاً صافيه بالمواسير
ترضخ للبركه قراحٍ من المي
سعود عبدالعزيز الهزاع - نعام
الغرس ميت والمكينه قديمه
واضنها تحتاج توضيب واصلاح
عان النخل غادٍ جريده هشيمه
ضامي وبيت الطين عصره بعد راح
منير مذكر العضياني
يا بلاك ستونٍ بالمكاين عريقه
راحو أهلك وزرعك وجرمك الباقي
ياما جذبتي مي من بيرٍ عميقه
واخضر بك البستان عبر السواقي
سعود عائش الحربي - جدة
دار الفلك بالخلايق والفلك دوّار
يولد بها ناس ويرحل بها ناس
دورة مكينه يبرمه سير مجرار
استبدلوا به سلك كهرب وغطّاس
أحمد سليمان الخزيم - الرياض
ما فيه مثل الوقت هذا ستر وغناه
الحال ميسوره والوسايل كافيه
وقت المكينه مبطي جاله شفاه
حسافه يا جماعه هملوها طافيه
حمد عبدالله الوايلي - حوطة سدير
مكينة البلاكستون فيها علامه
علامته من مصنعه فوق خدّه
وباليد هندل يشغله من منامه
يوم الزراعه ورياسته ما نهدّه
خليف فهيد الحربي - الرياض
اجدادنا في ما مضى لاقوا اتعاب
على السواني دايمٍ هو عملها
خص الفلاحه يضرب حساب وحساب
لاجل المعيشه .. والتفاني مثلها
ريان محمد الخنيفر - أشيقر
نرحب بمشاركاتكم الشِّعرية على ألا تتجاوز بيتين، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد