صوت الصورة

ذكرتني يا صاحبي ماضي الأيام
يوم المكاين والسيور الطويله
هندل وحذاف وطارتها قدام
صارت تراث اليوم عقب الوسيله
عبدالمحسن بن محمد المحيسن - رياض الخبراء
يا بكر أثارني شوف المكينه
والمهندس واقف(ن) يكشف عليها
كيف ولا وقتها صارت قديمه
أول(ن) الناس دايم تشتريها
عبدالمحسن بن محمد الجريسي - الرياض
أنا اشوف لي صورة مكينه بها حذاف
ولا ادري بلاكستون او ينمر المعروف
او استزر حقيقه شكلها طيب وتنشاف
يا حي القديم وحي طرياه لو بالشوف
مبارك بن محمد بن طرجم الضعاويد - وادي الدواسر
إن كان تبغى الشور يغارس الحيش
خل الحياله تراث واقبض لك قروش
طرمبه مكينه وبركتاً للمعاطيش
وجب لك زمله وناقة واشبك الحوش
سعود بن عبدالعزيز الهزاع - نعام
احييت لك عصر قديم وماضي
يوم الرساتم مايبدل عوضها
فلاحها في ما كتب له وراضي
اليوم ما ينفع تجدد شوطها
حمد عبدالله الوايلي - حوطة سدير
ما حلى زمان فيه كانت زراعه
يوم المزارع كان يجني محاصيل
يوم البلاك ستون كانت طماعه
يوم المكينه كن صوته مواوويل
خليف بن فهيد المرواني - الرياض
هذي طواحين بها النخل يسقى
تسحب مياه باسفل الارض رويان
تسقي نخل ربي به التمر نلقى
وهذا زمان نخلنا صار عطشان
سعيد فلاح الواهبي - بيشة
صوت المكينه مطرب كل فلاح
من بين عسبان النخل ترفع الصوت
وليا سمعها ضامي القيض يرتاح
حيث انها تروي حلاله عن الموت
سعد الحماد - روضة سدير
اشوف انا بيوت قديمه من الطين
وميكنه بارض العطش والنخل مات
حتى اهلها هاجرينه من اسنين
والماء حياة والى نقص يرث شتات
محمد بن صالح الأطرش - رياض الخبراء
الزرع قرب والمكينه جديده
توه تعدى عمرها قرن باعوام
صنعة بلاكستون قوه فريده
عشرين مع سته موثق بالارقام
عبدالكريم النغيمشي - الربيعية
مكينه اللستر تبي بلف والسير
وان دار هندلها معه عشت بحراج
وشفاط واطرنبه على فوهة البير
ومع طول عمقه للمواصير تحتاج
وديزل شحم والزيت يحتاج تغيير
وصار العوض غطاس يسقي بلا ازعاج
فهد بن عقيل الطويان - بريدة
صورة العدد السابق