الله ياهي جلسةٍ تطرب العين بين النخيل الباسقة..والسواقي

صوت الصورة

الله ياهي جلسةٍ تطرب العين
بين النخيل الباسقة .. والسواقي
القلب رفرف عاشقٍ منظرٍ زين
وأكل على كيفك لذيذ المذاقي
هذي القليب تصدر الماء من سنين
يا علّ من يجلس تجيه العوافي
عثمان إبراهيم الرشيد - الرياض
الصوره اللي بالخزامى ظريفه
والمجلس المضبوط محلا مكانه
راع النخل حط الغداء وين ضيفه
ومقطعٍ فوق الجدر سيدلانه
منظر طبيعي وسط حقله وريفه
عقب السواني صار شغل المكينه
عبد المحسن المحيسن - رياض الخبراء
يزين جوي .. والمكينة تحنّي
وحول اللزا يصفي لي الجو وارتاح
وتسمع بها الفلاح بصوته يغنّي
باهزوجة الأجداد في ماضيٍ راح
بين النخيل تحصّله ومتهنّي
وكبسه مع الأصحاب تبعث له أفراح
محمد عبدالعزيز الخنيفر
- أشيقر
يا زين ذا الدكة على جال صباب
وظل النخل يضفي عليها البروده
هوى طبيعي خالطه ريحة اعشاب
يغنيك عن الجاوي إذا فاح عوده
المزرعة منتوجها جح .. واعناب
والببس يبرد في ثواني معدوده
سعود عبدالعزيز الهزاع - نعام
بين النخيل وبين ذيك العواريف
وجال القليب يحدها من شمالي
جلسه على كيفك يا باغي الكيف
ولين يصب الماء ويسحب قبالي
ومكانهم بارد ولو كان بالصيف
موعد غداء يا ناس مابه مجالي
تمو على الميسور والبادي الضيف
أهلٍ هلا في ظلها .. والظﻻلي
حمد عبدالله الوايلي - حوطة سدير
جنب القرو بالظل حيوا غداكم
ذا حقكم يا خوان واللي بيدينا
كبسة لحم والببس ذا من غلاكم
تفضلوا يالله قراكم علينا
وإليا شبعتوا غسلوا من لزاكم
شكر النعم لله عليها ربينا
عبدالكريم النغيمشي- لوذة
سفرة ذاك الزمن خمسة نجوم
جلسة حمراء على جال المصب
يا سلام الله على ذيك العلوم
طيب قلب ومرجلة تنسي التعب
البساطة عاش فيها خير قوم
عزهم بعد الولي علم وأدب
النعم كايد ولا ناله رخوم
ما يحصل طولته هب .. ودب
أبو بكر عبدالعزيز الريس - الرياض
كبسه .. وببسي يهضمها
لو قالوا فيها .. ومافيها
كم واحدٍ حيل دلقمها
وعظامها في تواليها
امدنقٍ ما تطعمها
يقول يالربع مغليها
فلاح مطر الحربي - القريات
راح التراث ولا بقى له بواقي
الا معالم بيرنا يا ابن الاجواد
يا حلوها من جلسةٍ بجنب ساقي
وغرسٍ من البرحي على وقت شداد
حط الغدا يا معدلين السواقي
القرض قبل الفرض لوعاد وش عاد
شجعان سعود المقاطي - الرياض
جلسة وكبسة والمكينة لها صوت
يعجبك صوت الماء تسمع صبيبه
لا واهني الفلاح بالحيل مبخوت
في جلست الأقراب ماهي غريبه
بين النخل مابين الخلاص ونبوت
ذي عادة الفلاح والله رهيبه
ريان محمد الخنيفر - الرياض
هب الهواء بين الغرايس والأغصان
وزانت لي الجلسه على كيف كيفي
مديت انا الفرشه وحطيت صيوان
وصرت اترقب يا هل العرف ضيفي
تفرق عن القعده بين الأربعة جدران
لا صار وقتك يا ولد الأجواد صيفي
خالد ناصر المخيمر- روضة سدير
نرحب بمشاركاتكم الشعرية وما تلتقطه
عدساتكم من الصور الهادفة والطريفة..
على إيميل الخزامى:
rb-khozama@alriyadh.com
أو الفاكس رقم: 0114871070
صورة العدد السابق