ابعد عن اللي كل هرجه لجاجه

عريض صدر ويدبل الكبد بازعاج
عنيد راي وكل قوله سماجه
يومي بايدينه عالي الصوت لجلاج
هذا البليد اللي بهرجه عواجه
ماينعدل لنه على الصغر منعاج
واقرب من اللي كن حظه زجاجه
مايدخل بسب المخاليق واحراج
صديقن يودك لو تضايقت ناجه
عون الصديق لياتنصاه محتاج
واللي يقيم الناس كل بمزاجه
اعمى البصيره تايه الراي هلباج
عنده بوصف الناس بيه وخواجه
وناسن يرفعها على ناس بابراج
هذا شبيه الصقر وهذا دجاجه
وهذا شبيه شيوخ او ذاك حواج
هذا المريض ولايفيده علاجه
فاقد شعور ولو على راسه التاج
واقرب من اللي لو بغيته بحاجه
مروي الكبود المظميه مثل هداج
كريم سبلا ودوم يضحك حجاجه
قربه ربيع ويجلي الهم وافراج