يبقى التعامل في مروه وشيمه

الى حظر واهس وفكره وتصوير
جاء في بيوت الشعر معنى وقيمه
يقطع بها الشاعر طوال المشاوير
ويسري على منهج وخطه حكيمه
باسلوبه الراقي يفيد الجماهير
ويواكب الواقع بصبر وعزيمه
واللي على النهج السوي واصل السير
ما يرغب الا السيره المستقيمه
هذا ولك يالمستمع كل تقدير
خذ كلمةٍ فيها وقار وحشيمه
الى انفتح بابٍ يوصلك للخير
عدّه من ابواب الرضاء والغنيمه
والى انقفل بابٍ يجيب المخاسير
عدّه فضل واسع ونعمه عظيمه
والى حصل سجه وغفله وتقصير
ضياع وقتك له عواقب وخيمه
وان ساقت الدنيا عليك التباشير
ماهي على مر الليالي مقيمه
دوّر رضاء ربك ولي المقادير
وان جاك خير اطلب من الله يديمه
واحفظ لسانك عن جميع المحاذير
قبل يجرك للخطاء والظليمه
واحذر كلامٍ يجبرك بالمعاذير
مالك وراه الا الفشل والهزيمه
والى انشغل بالك ورى كل تبرير
ما تطلع الا في نتايج عقيمه
علوم خلق الله ورود ومصادير
ويبقى التعامل في مروه وشيمه
وعند الله المعبود كل التياسير
مدات جوده للاوادم كريمه
دنياك هذي غير والآخره غير
والحظ لاصحاب القلوب السليمه