ليت الزمان يعود ويِرِد جِيله

للصورة اللّي شِفت ذكرى جميلة
يالله عساه تْعود ونْوَلّع سْراج
ياكِثر ما ولّمت قازُ وْفتيله
أخاف لاجا الليل يقضي ونحتاج
قِزازِته تمسح بقطعة فنيله
يازين نوره كل ماشب وهّاج
متوسط الجلسه سنينٍ طويله
قبل نشوف بْحيّنا أسلاك وأبراج
ليت الزمان يعود ويِرِد جِيله
هاك الزمان اللّي على روسنا تاج
عاشوا على الفطرَه وطِيبُ وفضيله
لا مصدر إزعاج ٍ ولا مصدر إحراج
عِزّي لحالي والخوي عزّتي له
ما عاد يزهم عقب مامات هدّأج
قِل للخليل اللّي يودّه خليله
لا يصغي بْسمعه ورا كل هرّاج
زماننا اللّي نرتجي لو قليله
غدا على غَفله وعن شوفنا ماج
يالله عقبه عاف حالٍ عليله
مافاد فيها طب دكتور وعلاج