هذا السمك وسط البحر دايم يعوم و مكه تمام الحل يالمودماني

كتب لغز الأسبوع الماضي الشاعر خليف فهيد الحربي من الرياض، الذي يقول:
ياويش بنت تجتول دايم الدوم
اربع حروف اسمه اكيد وضماني
اول وثاني حرف مميت معلوم
واخر ثلاث حروف اسم لمكاني
وقد توصل للحل الصحيح من أصل 94 حلا كل من:
يا مرحبا ياخليف والحل مفهوم
يجيك حله بالخزامى يباني
اقول سمكة طبعها دايم الحوم
ارسلت حلى مابها حل ثاني
علي الرشيد - رياض الخبراء
ياخليف لغزك عندي اليوم مفهوم
وساعة قريته جبت حله معاني
وعمق البحر فيه سمكه دايم تعوم
يصيدها الصياد في وقت جاني
حمد عبدالله الوايلي - حوطة سدير
يامرحبا واللغز واضح ومفهوم
وسط البحر لقيت حله ضماني
هذا السمك وسط البحر دايم يعوم
و مكه تمام الحل يالمودماني
محمد بن عبد الرحمن أبودحيم - البدائع
ياخليف حل اللغز واجب وملزوم
لغزك صحيح وكامل بالمعاني
السمكه وسط البحر مشيها حوم
تمشي طرب بين الخفا والبياني
زبن مقبل العنزي - بريدة
ياخليف حل اللغز واضح ومفهوم
عرفت حله يوم ربي قداني
شف السمك وسط البحر يدرج العوم
هذي حياته كل وقت وزماني
جود ممدوح العنزي - بريدة
ياخليف لغزك واضح ن لي ومعلوم
محبوك يعرف عند أهل المعاني
تراها ذي سمكة ماتعرف النوم
ومكة تستقبل ضيوف وعاني
محمد بن سليمان العجلان - الرياض
ياخليف لغزك واضح اليوم معلوم
عرفت حله قبل اغادر مكاني
البحر للسفن تجري على الدوم
وصيد أسمكه حلال بأية زماني
علي بن سعد بن هتلان - الرياض
ياخليف لغزك سهل احله بيوم
والبال لو رايق نحل بثواني
السمكة يومٍ وسط بحرها تحوم
ويومٍ مع العيش تنام بصواني
محمد السعيد - جلاجل
ياخليف لغزك عايش في البحر دوم
ذاك السمك يابادين المعاني
يارب تفرجها على كل مضيوم
ويوم الشدايد ماتفيد الاماني
زيد عبدالله ال مسلم التميمي - الحلوة بحوطة بني تميم
لغز الأسبوع
كتبه للصفحة الشاعر سعد صنهات السهلي من الدرعية، ويقول:
ياويش ثنتين خفيفات وثقال
واللي عملهن صح هن ينفعنه
افضل من اللي قال ويقول وش قال
هذا الصحيح وصح مهوب اضنه