أيام القنص يفرح بها كل قناص يتعب على طيره ويفرح بشوفه

الطير لبّى يوم راعيه ناداه
وقّع على يسراه والحظ يتليه
يبي يهدّه بالفضا ثم ينخاه
وهو فهيم ولا يبي من يوصيه
طير مدرب والسعد ما تعداه
لا دك في جول الحباري عثا فيه
علي الرشيد - رياض الخبراء
مدري بقايا سبق برجول ذا الطير
ولا متعمد صاحبه شي ثاني
الصيد كانه يلقى ابشر بخير
يجيب من جزل الفرايس سماني
مخلاب ساقه يعلقه بالشناكير
يقطع نفسها ما تعدى ثواني
سود العيون معكفات المناقير
يعجبك فالمقناص حر وشهاني
سعود عبدالعزيز الهزاع - نعام
الطير الأشقر في السماء فارد الريش
مهوي على الصقار من عالي الجو
انحصّل الصيده ترى ودّه العيش
ويمكن يجي صيده مع هبت النو
الوضع صعب وما تحصل ولاهيش
وياللي تحب الطير مبطي ماهو بتو
انصحك فك الحر يلقى العراميش
خلّه يدوج في الخلا مطلع الضو
حمد عبدالله الوايلي - حوطة سدير
يا هاوي للقنص احرص على الطير
حقق له المطلوب يا راعي الطيب
والطير له ربعه رجالٍ مخابير
هي تعتني به خص وقت التداريب
والحر وقت القنص يا ربعنا غير
اسال رجالٍ عارفين التجاريب
وتبي يسرك لا يجي منك تقصير
حافظ على اكرامه بفكرن وترتيب
محمد عبدالعزبز الخنيفر - أشيقر
أيام القنص يفرح بها كل قناص
يتعب على طيره ويفرح بشوفه
لا حلّق بجو السماء تقل ايرباص
مابه ولا صيده على الارض تطوفه
يشفي غليل اللي على الخرب قصاص
لا شاف زول الصيد مابه مروفه
احكم عليه بقبضة كنها ماص
ومخالبه تمكنت من وسط جوفه
خالد ناصر المخيمر - روضة سدير
ما كل ما طار وارتفع
يجذب عيونك والسمع
إلاّ الطيور الجارحه
والحُر منها في السَنع
يضرب وهو وسط السماء
وإن طب صيدٍ له خضع
ما يفرح إلاّ بالسمين
وبمخلبه كل الوجع
لَكن على كَفٍ رعاه
محبوب ولشوقه رجع
صالح علي المبارك - حوطة سدير
لوّح لطيرك ازرق الريش لوّح
جاك الهداد وهبّت الريح وسمي
عقب العصير ويمّة الريع روّح
ارم الجناح ورد بالجسم قدمي
في مهنةٍ التدريب غادي مروّح
خلك لعل الطير بالصيد يدمي
لاشاف زول الخرب يمه يطوّح
ينزل عليه ومخلب الموت يرمي
عبدالكريم النغيمشي - لوذة
صقرٍ وصقّارٍ وصورة لها شان
وقوّة علاقه والنظر يجذبونه
والطير والصقار من ماض الأزمان
كم فرّحوا بالصيد من يحترونه
الطير ماكر مع مخالب وجنحان
وباق الوصوف أهل الوع يعرفونه
وراع القنص لا عاد ربعه مسيان
البن زاهب وأكبر الخرب يشوونه
ميعادنا يا طير في شهر نيسان
لا زان صيد الخرب للي يبونه
سعود عائش الحربي - جدة
اشوف راعي الحر يجري التمارين
لعل طيره مكسب ثم يرضيه
ياما كثر القناص للصيد هاوين
ذي عادة الصياد صعبٍ يخليه
في كل موقع ماذخروا دوم ساعين
والصيد عاده كم من الخد تطويه
وكل اكثر اهل الصيد تخسر ملايين
هواية مع عادة عند راعيه
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
Your browser does not support the video tag.