لاتشغلك دنياك

يالله ياعالم جميع الخفيات
ياقاسم الأرزاق يامنزل الدين
يافارج(ن)كل الهموم العصيات
تسمع دعاء خلقك ولوهم ملايين
اوجبت حقوق الخلق فيهاالتزامات
باالذات لاصارو لنفسك قريبين
اوجبتها من فوق سبع السموات
حق الأبو والأم مادام حيين
اخفض لهم جناح ذل ومدارات
لياك ترخصهم تراهم عزيزين
وإن طعتهم تسعد بكل المجالات
سعادتك تشوفها شوفة العين
تبرُك عيالك بوقت المعانات
وزادت سنينك واتركوك البعيدين
خذها نصيحة واحد(ن)ذاق حسرات
امه بوسط القبر من عدة سنين
لاجت ببالي هلت العين عبرات
ترجع بي الأفكار والهم يطوين
باب وتقفل جعلها وسط جنات
بفردوس ربي وسط فل ورياحين
احرص عليهم دام بالصدر زفرات
باالزين عاملهم ولاتقرب الشين
لاتشغلك دنياك وتبعد مسافات
وتضيع في دربك وتخطي العناوين
تندم ولا ينفعك حينه شفاعات
من مات ما يرجع وذا تعرفه زين
Your browser does not support the video tag.