أنا جريح وعبرتي صك إعسار

يا صاحبي ماجَاتِ من يمِّك أخبار
تطفي لهيبٍ يشتعل في حشايا
بيني وبينك موج وحْصون وأسوار
بِعدك تسبب في عناي وشقايا
سرب الهنا من خاطري سَفَّحِ وطار
إرجع ترى هجرك ذنوب وخطايا
الآه والتكات وجيوش الأفكار
تطحن بقلبي مثل طحن الرحايا
ثملت حزن والفرح كنه العار
خجْلٍ يبين في حماي وسمايا
خلفي براكينٍ ومن قدمي النار
اِموجهه صوبي سهوم المنايا
وجه السعاده مِتِّخِذ عني سْتار
مانيب له محرم لِيَأنس معايا
مازارني لو كان عابر ومرّار
ويشوف حالٍ صار عظم وبقايا
أنا جريح وعبرتي صك إعسار
كل الأماني دون طيفك عرايا
قربك منايه ما أبي منك تذكار
أبيك كلك دون كل الصبايا
ياصاحبي قلبي من البعد محتار
والحزن في نفسي سيوله جرايا
طال انتظاري والوله سيف بتار
مشاعري صارت لغمي سبايا
كل يوم أقطف لك من الحب أزهار
طبعي اِبْوُِجُودك يا حَسين المزايا
ما تنفع المطعون جزلات الأعذار
مثل الذي يهدي لكفيفٍ مرايا
سلام واستسلام يانور الأقمار
مع السلام أرسل فريد التحايا
عسى غيوم الود تنزل بالأمطار
تروي جوارح من حنانك ضمايا
شاورت عقلي بسِّ بالصد ماشار
في ديار حبك نوخت بي المطايا
أما وَصِل والا الْوَجِد لِيِّ قبار
لا تْمِرِّ قبري وأنت قاتل هنايا
ليت الظروف لصاحب العشق تندار
وِتْحَلِّ له فِ الحبِّ كل القضايا
ناصر جمعان آل عوض / وادي الدواسر