الله يعوضك بالجنان الرغيده

مرثية في والدتي نورة بنت ناصر بن فهيد الغربي العتيبي ( الفهيديه )
يا جنتي وش هي حياتي بلياك
وموتك علي بالذات أكبر فقيده
يومك لحقتي أبوي واقفت مطاياك
أنا تسلحت الصبر والعقيده
يا جنتي أعجز أعدد مزاياك
حيثك تميزتي صفاتٍ عديده
يا جنتي محدٍ يسوي سواياك
رغم الشقى عشتي حياة سعيده
كفلتي الأيتام ويفخر بطرياك
ومعروف فعلك مارجيتي حصيده
أجرك على اللي ما جهل في نواياك
رب عظيم الشأن محصي عبيده
نشأتي على الفطرة وزهدتي بدنياك
وبرك بجدي كنز ذخرٍ رصيده
يا جنتي قصّرت مالحق جزاياك
مهما فعلت أمي لبرك زهيده
كنتي هنا عمري وشوفة محياك
بلسم عنى وقتي سنينٍ عديده
وحيدتك تنعاك و تذكر سجاياك
كنتي السند ضد الظروف الشديده
واليوم عزي من تحلّوا حلاياك
اخواني اللي عزوةٍ لي أكيده
يا جنتي ما غاب منطق شفاياك
شهادة التوحيد وانا لك أعيده
عسى أمر ربي يكفّر خطاياك
والله يعوضك بالجنان الرغيده
حصة فيصل الغربي