جنّب عن اللي كل الأجواد ذمّوه لا تتبعه لو كان يعطيك ماله أحرص على اللي كل الأجواد حبّوه يقال نعمٍ فيه لا جاء مجاله المعدن الطيّب يبيّن لا حكّوه لو كان مغشوشٍ يبيّن خماله الناس تلقاهم على ما تربّوه الكل منهم تبخصه من فعاله ترى الولد ينبْت نباته على بوه إن طاب فعله وإن تردّى غداله العِرْق دسّاسٍ ولو كان خفّوه إما لحق في بوه يلحق في خاله قلته وأنا قبلي من الناس قالوه أحذر تجي يم الردي في ظلاله لو كان يرّث خير ما كان خلّوه ما كان بعض الناس دوَّر بداله مثله على الضميان ما منهم اسقوه كنّه محرّم فيه شربة زلاله وإن صار راعي منفعه كلّهم جوه كلٍ ينشّد عنه وش هي أحواله واليا خذوا منه المصالح تقفّوه حَذْفوا من الجوّال رقم اتصاله كلٍ تقفّى عنه حتى بني خوه وتشوف ما في البيت غيره لحاله