أمواج الحنين

يمخر عباب الليل هاجوس ن طرى
في غبة الأشواق وأمواج الحنين
(مده) وله لو كان (جزره) مابرى
ما بين وصل وصد تيار السنين
ولا هب (شرو) الشوق عن قاعه درى
وين المحار اللي به الدر الثمين
يرسي على سيف الهوى فوق الشرى
لو إن حرزه فالهوى حرزن مكين
ولا ذعذع الغربي على صوته جرى
دمع العنا لا شك ما باح الكنين
ولا لاح نور البدر في ليله سرى
لأطلال فيها (مر) وضاح الجبين
اللي بنوره يشعل الليل وذرى
لا مال غصن البان في رقه ولين
يهل وبل الشوق ويطير الكرى
وأجني من عذوق السهر ذكراه لين:
يبل حلق الليل ريقه والثرى
خضب ثراه وفاح ورد الياسمين
ولا غاب عني ما على الدنيا ورى
ويتل مياح الهوى حبلٍ وتين
وسط الضلوع اللي تصافق فالعرى
قرب السواني تجذب الدمع الحزين
عليك ياللي من ورى طلعة كرى
غايب ثلاث سنين والله لي يعين
حالي براه البعد وانته لم ترى
كيف الهوى سوى بحال العاشقين
واليوم جرحي والوله فيك اخشرى
وتطري على الهاجوس والخافي يبين
ويمخر عباب الشوق هاجوسٍ طرى
غنى على (ياهول يامال) انت وين؟
ضمن عواد السناني