خل المدن خلفك ومعها شجونه

الوسم مقبل و العرب يحترونه
و السيل يحيي كل أرض وطاها
و المزن يا زينه و يازين لونه
لامنها هلت وجادت بماها
صوت الرعد بشرىٰ لمن يسمعونه
و البرق يضوي عاليٍ في سماها
الخير لا منه توالت مزونه
جاك الربيع و زان نسمه هواها
و السيل له شوق و ناس يبونه
يا ما حلا شوفة بقاعٍ لفاها
خل المدن خلفك و معها شجونه
و أقبل على برٍ كثيرٍ نماها
هذي زهور العشب يختال لونه
زوليةٍ من خير ربي عطاها
الناس تنشد عن فياضٍ و يجونه
ما تشتكي لو زاد منها عناها
طيورالبراري ساجعات لحونه
أحن مثل الطير وأنشد وراها
خلك مع اللي ما تسافر بدونه
مع شبة جروم و صفرٍ حذاها
نبت الخزامى كابات غصونه
و اللي عليلٍ عطرها هو دواها
البر عشق و زينته في سكونه
في روضه خضراء و ربي كساها
عثمان ابراهيم الرشيد- الرياض