منظر الصورة يزيد القلب فله منظرٍ ماهوب في جو المدينه

صوت الصورة

يا حيْ هذا الشوف والسّيل جاري
عِقب المطر يجلا صدا زايد الهمْ
هذا هوى اللّي للمشاوير ضاري
لا ضاق من صَدّة ولدْ خاله أو عمْ
وعاف البخيل اللي إبْماله إيماري
وإن جالِه المِحْتاج صدْ أو تبلّمْ
الصبْح والا بأول الليل ساري
لا.. لا حله برّاق عفْشه إمْولّم
فهد عقيل الطويان - بريدة
ترى النخل يحتاج خدمة وتكريم
وإهمالها ما هي بسيرة حميدة
عسبانها متهدله زود تحطيم
من فقدها لأمثالها جت فريدة
تشكي لربه كثرة الجور والضيم
لو كان تنطق كان سوت نشيدة
علي الرشيد - رياض الخبراء
الجبل ثابت وشامخ في محله
زان جو الجو والمكشات وينه
المكان الزين وينه من يدله
يمكن إنه يا بكر من فوق لينه
منظر الصوره يزيد القلب فله
منظرٍ ماهوب في جو المدينه
وشوفة الشلال يدرج مع مطله
في مصبّه تنبت أشجارٍ متينه
حمد عبدالله الوايلي - حوطة سدير
الحمد لله وأرضنا عمّها الخير
يا سعدنا يا فرحنا يوم جانا
ذي نعمةٍ يا ناس تحتاج تقدير
والشكر لله ربنا اللي عطانا
واليوم أشوف الناس تضرب مشاوير
لأجل الربيع اللي به الجو زانا
وهذي نصيحة كلها اليوم تحذير
ابعد عن الوديان وخلّ الهوانا
محمد عد العزيز الخنيفر- أشيقر
الله على جوٍ يشوقك نسيمه
الماء والخضره ورفقة مطاليق
على غدير شوفتك له غنيمه
يحلى به الفنجان مع فكة الريق
ومن بعدها كبسه برز الوليمه
ولحم الهرافا مثلها ما بعد ذيق
مكشات تحيا به قلوبٍ هشيمه
ينسيك مايكدر على البال ويضيق
خالد ناصر المخيمر - روضة سدير
سالت أراضينا في كل الأقطار
يا فرحة العربان يوم بمجيّه
يا زين أرضٍ كلها خيور وأمطار
أفراح تلو أفراح ونفسن رضيّه
بجوٍّ ربيعي ويا حلو شبّة النار
ومجلس ربوعك مع طيب نيّه
سوالفٍ يا زينها ضمن الأخيار
فيها الهنا فيها الثنا بلا خطيّه
ريان محمد الخنيفر - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق