تعيش العباد بما يناسب طبيعتها

جميع المشاكل غاطسه في عميق النوم
ولكن ليا جتها الشياطين صحتها
شياطين الانس مروجة هرجها المسموم
بكذب ونفاق وغش تنشر دعايتها
تثير المشاكل والفتن بين ليل ويوم
وترتاح مع كثر المشاكل وصجتها
طموحاتها فالوقت نمه وجمع علوم
نقلها فلان ومن فلانه بدايتها
صفات رديه ماتجي غير فارذل قوم
وعندك تزين اخلاقها وقت حاجتها
على الغدر عاشو والوفي عندهم معدوم
يتيه النبيه ولاعرف ويش غايتها
انا وش يوديني مع الشارع المزحوم
وانا ويش ابي بالخلق ما اريد لجتها
ما دام إن حقي واضح ما عليه دحوم
وش اللي يوديني للافعى وشجرتها
أبلبس على قدي ومالي عن المقسوم
ولي منهج يحفظ لنفسي كرامتها
أحب النقى وابعد عن المجلس المشوم
واحب الصراحه لو تبين مرارتها
واحب الوفاء ومرافق العاقل الشغموم
زحول الرجال اللي تشرف رفاقتها
وماني على الهذار ومجادله ملزوم
يحصل عباد لهجته مثل لهجتها
هبيل عن المعروف سار به الجاثوم
ضعيف ونفسه همها دوب لقمتها
مع الخيل ياشقراء وفي كل بحر يعوم
ولن مرته قوم تلوى بساقتها
ابا اعز نفسي واتركه وابتعد واشوم
وباغلق مجال أهل السوالف ومنتها
وسوق الردى ما ابيع به واشتري واسوم
ومثلي رجال هاجرين بضاعتها
بضاعة ردى بنيانها فوقها مهدوم
ومنها برة كل السلوم وعراقتها
مجال لمن ما حسب المنقده واللوم
ولا ابو لحا قوم تهاون بسمعتها
وكل بمعرفته وله منهج مفهوم
وراع الرعية ينشد عن رعايتها
واحد عارف دربه واحد سارياً منجوم
تعيش العباد بما يناسب طبيعتها