يا أبو فهد يا طيب ميقاف الصمايل والعزم

يا سيدي سلمان فالميقاف نصمل ونعزم
حنّا لها يا سيدي حنّا لها .. حنّا لها
النصر بيد الله تعالى ثم عاصفة الحزم
ما للمواقف يا وريث المجد غير رجالها
حنا العرب والبيرق اللي نرفعه ما ينهزم
حنا الجبال الشامخات اللي يظل ظلالها
قد قيل في الأمثال والصامل على الوقفة عَزَم
القوم من نباها.. والخيل من خيالها
يا أبو فهد يا طيب ميقاف الصمايل والعزم
والله يبارك في جهود العاصفة وأبطالها
الكايده يا ذخرنا تبغى لها عزم.. وحزم
ولا يبرك للحمول الا ظهور جمالها
الحرب شبت نيرته والشعب كله محتزم
يا أما نعقد حبالها.. والا نحل حبالها
اللي يخون الجار واللي بالعهد ما يلتزم
يبشر بضربة قاضية عند اللزوم ينالها
ناطى على وجه العدو ونقوم ونخزمه خزم
والعز منهاج الرِّجال اللي تعد أفعالها
تخضع لنا روس العِدا وتلين ويموت القزم
حتى أنها فالماقف المحسوم تلقى فالها
خل العميل الحوثي الحاين يموت وينجزم
وإن كان عنده فالملاقى حيلةٍ يحتالها
الله يعز الدين وأهل الدين والواجب لزم
والنصر بالله والبيارق عاليٍ منزالها
علي الشنَّاني