فز الجرح

كل ماحنيت فز الجرح وتهبّ الطواري
وتنفض الذكرى سكوتي وأتشبث في يديها
ماذخرت الصبر ياخيل المواجع للمساري
وماحسبت العمر يرخص في عيون اللي أبيها
وماسألت الريح عن ذنب السنابل والقماري
لا متى؟..أدفع ثمن غلطاتها وأستر عليها
أنتي ياللي مابقا للشوق في قلبك مواري
أغرسي خنجر طعونك فالحنايا وأتركيها..
وسولفي لليل عن قصة طموحي وانكساري
فضفضيها حبة/حبة والدرايش سكريها
وأقطعي شعرة جنوني وطفّي شموع انتظاري
فتّشي في ذكرياتي والرسايل بعثريها
و القي النظرة على ساحل صمودي والصواري
كل مامرّت على مينا جحودك ودعيها
إيه أنا اللي كنت عاشق ماعشقت إلاّ اختياري
إيه أنا اللي كنت وافي: بس أنا اللي رحت فيها!