النهار الحزين

مغرب الشمس وفتور النهار الحزين
وباقي جروحك ودمعي وذكرى الوداع
أحتضنها المكان وبعد هذي السنين
أهتدت لي ودلتني طريق الضياع
قلت يمكن تجين! أكيد لازم تجين
ونتواجه بعد أربع سنين انقطاع
من رحلتي وأنا ما بين وينك وبين
ليه غبتي وضاقت بي الفجوج الوساع
ليه قلبك قسا قبلي وقلبي يلين
ليه أطاع وعصا ليته عصا قبل أطاع
إن بكيتك محبة وإن بكيتك حنين
ما انكشف عن غيابك من حنيني قناع
كنت أشك أن هذيك الشكوك اليقين
بعد ما ساورتني قلت بعد اقتناع
الحبيبة تغيب وبعد مده تبين
خل حبك لها والكره حد النخاع
كل حب وله فرقا وساعة وحين
وكل شمس لها مشرق ومغرب شعاع