صباح العيد

كلٍ صباح العيد عيّد بالافراح
وانا صباح العيد عيّدت بهموم
عيّدت بين الهم واحزان واتراح
العيد ماله فزة العيد هاليوم
الناس ليل العيد بسكون ومراح
وانا عيوني ما لقت لذة النوم
الورد وسط الريف بالعطر فواح
وانا عطوري هم واحزان وغموم
كلٍ لبس بالعيد من ثوب ووشاح
وانا ثيابي كلها نار وسموم
الناس صبح العيد بسرور وافراح
وقلبي من الاحزان للسعد محروم
اشوف في عيني غرابيل وجراح
والناس تحسب خاطري فرحه يدوم
دايم وانا قدامهم ضحك ومزاح
مابي أبيّن حسرة القلب واللوم
متى يجي يومٍ به الخير وضاح
والسعد في قلبي مثل غيث بغيوم
وافرح نهار العيد والقلب مرتاح
وانسى العنا والهم في دنيتي دوم