عرفت السهر عقبه

قصيدة رثاء في أخي الفقيد سلطان عمير الحربي - رحمه الله.
تجافى جنوبي كل ما زان لي النوم
اعاف الكرى لو أكثر الناس تختاره
ليا هملجت عيني تقل بالجفون هزوم
يحجب السبات اليا اسدل الليل بستاره
واغيب بخيالي كن ما بالوطا معدوم
واهيم بغياهب ماضي الامس وأسراره
مع اللي فقدته في نهار عليّ مشؤوم
نهار يزوّل لي ليا حلّت اذكاره
ليا راح تفكيري مع الماضي المقسوم
سريت اتبعه يالين ياقف على داره
نحابي عن الحيين واقبل على المرحوم
وتذكرت يوم اودّعه واطوي وزاره
عضيدي عليه انسف ثقيل الحمل واقوم
عليه الأمل مار ان الأيام غداره
عرفت السهر عقبه ومن يومها لليوم
عليه المدامع كنها نضح مطاره
لو اني تمثلت الفرح خاطري مكتوم
عسى الله يبدّل ساعة العسر بيساره
ولو ان الليالي عزها والرخا ما يدوم
نهار المفارق يجرع القلب بوراره
بها يضعف الرجال لو هو قوي عزوم
لو انه تصبر فيه الاعصاب منهاره
ومدام العمر محدود وان الفنى محتوم
ابرضا بما يكتب لي الله ويختاره