عذرك معك

ياللي عن العين غايب
وأنا أدري انه لو هو بيدك ما غبت
الحظ خاب ودايم الحظ خايب
وان خاب حظي معك معي انت ما خبت
انت المقرب وأقرب من القرايب
بالحب همّ اجناب وانته تقربت
لو شفت غيرك من طوال الذوايب
ما ذبت فيهم وأنت في طلّتك ذبت
يا طيبك بقلبٍ بطاريك طايب
قلبا على عرشه عليت وتنصبت
على كثر ما مرني من مصايب
نسيتها والحين من بعدك انصبت
رحلت عن عيني بليا سبايب
وأنا احترق لاني ما حس أني أذنبت
متمرداً فالحب ما كنت هايب
واليوم من طوله بعادك تأدبت
مكبوت واجذب ما تجيب الهبايب
ولا قدرت انسم ولا اسلم من الكبت
انبتني بالحب وأنت السحايب
وما دام رحت وغبت من يسقي النبت
من تاب عن ذنبه يخاف العقايب
يا مذنباً فيني تبي تموت ما تبت
ارجع ورجع ذكريات الحبايب
ذكرى نراجعها من السبت للسبت
ولانته بمعذورٍ اليا ابطيت غايب
وأنا أدري انه لوك تحب ما غبت