هذا قراري

لا تدعين انك حزينه لفرقاي
لا تدعين الشوق لا تدعينه
لا تدعين انك بكيتي لممشاي
شاعر نساك وراح لا ترتجينه
يا ما شكيت وقلت ما فاد رجواي
قلب عطاك الود لا ترخصينه
ياما بكيت ونحت مع بحة الناي
ياما شكى هالقلب خافي حنينه
باسبابك انتي صرت قاسي ونسّاي
أنساه حبٍ مات وانسى سنينه
شوفي حياتك والحقي عمرك الجاي
مثلي أبد ما عاش منهو يهينه
ما لوم انا اللي منخدع فيك والماي
ما ينفع الظميان لا انحاس طينه
مخدوع مثلي فيك ماهو من اعداي
ما قول انا يا كود ربي يعينه
هذا قراري مقتنع فيه برضاي
روحي فمان الله للي تبينه