هذه القصيدة رثاء في خالي الشيخ سليمان بن خليفة الخليفة التميمي أحد وجهاء وأعيان محافظة الرس وعميد أُسرة الخليفة الذي وافاه الأجل يوم السبت الموافق 30-4-1427ه ودُفن بالرس يوم الأحد الموافق 1-5-1427ه رحمه الله رحمة واسعة وأسكنه فسيح جناته البارحة ما طبق الجفن غافي سهران يوم الناس حولي ينامون يوم الخبر جاني بنيت القوافي سطرتها بالخال من قلب محزون الموت ما يفرق غني وحافي مهما تطول أعمارنا الموت مضمون الموت حق وكلنا فيه لافي حق لكل الناس مهما يفرون يوم الاحد جابوه والجو دافي وعليه عقب الظهر صفوا يصلون باول شهر خمسة بوسط اللحافي من عام سبعة فوق عشرين مدفون حاولت ارد الدمع واقول كافي وادموع عيني بيحت كل مكنون أبو خليفة مات أبو قلب صافي يا وسع عذر اللي على الخال يبكون يا فزعة اللي له زمانه مجافي يا بلسم اللي من عنا الوقت مطعون فعولك البيضا تراها تشافي يدري ولي الناس والناس يدرون وافي ومن ينصاك يلقاك وافي مرحوم يا خالي عدد ورد واغصون مرحوم يا خالي وموتك حسافي راضي بحكمك يا الهي وممنون مرحوم يالشهم الكريم السنافي يرحمك ربي ما لعج بارق امزون عد البحر عد الشجر والفيافي واعداد من بالبيت حوله يطوفون يالله يا علام كل الخوافي يا واحد لك جملة الناس يرجون ياواحد جودك على الخلق ضافي يا نابذ يونس نبيك من النون قبر سكن به ما يجيه الجفافي عسى سحاب الخير يسقيه بالهون عساه بالفردوس ما به اخلافي في جنة عرض السموات والكون حرف القصيدة تم واختام قافي صلوا على المختار ياللي سمعتون
