تقليد غربي

قالت لي العشاق سوو لهم عيد
وش فيك ما عايدتني قبل يومين
اليوم (سطعشر) وقبل أمس تحديد
من شهر فبراير احتفلوا المحبين
قلت اسمعي وش لي بعرف المقاريد
اللي نقلدهم دواماً في الشين
ما عمرنا خذنا من الغرب ما يفيد
ولاعطونا طيلة الوقت شي زين
حنا لنا عاداتنا والتقاليد
ومن قبل هذا طاعة الله في الدين
لو إنه إلا ورد لازرع لك البيد
ورود حمراء مثل منتي تحبين
المشكل إنه فعل خاطي وتقليد
غربي.. إلينا صدروه الملاعين
ياما وياما صاب الإسلام من كيد
كادوا وما زالوا يكيدون للحين
وإحنا كأنا عن مكايدهم بعيد
نمشي ولا ندري خطانا الى وين
غلاك يكبر في الحشاء دوم ويزيد
من قبل مسمع عن (حكاية فلنتين)
ملعون بن ملعون له مكر ويريد
يسوق أفكاره لبعض المساكين
أي حب ودك نحتفل به وأي عيد
اللي أعرفه عندنا بس عيدين