مابه احدٍ يجاوب

جونا يشرح الخاطر لنظم القصيد
والبلاء في خفوقي كيف ينزاح همه
كيف أبكتب وانا (بالرس) كني وحيد
ومابه أحدٍ يجاوب كلما قلت يمه
كيف أعبر وحزني كل لحظة يزيد
والأحاسيس تاهت (يا فهد) كيف آلمه
يمه.. يمه.. يا يمه.. ليه صوتك بعيد
وليه كفك ثمان أيام مقدر أضمه
كل يومٍ على هالحال مامن جديد
كود ريحة عباتك لا بكيتك أشمه
ادري إن البكاء لي والسهر ما يفيد
مثل طفلٍ مسح دمع المواجع بكمه
صرت أحس بضلوع الصدر نارٍ تقيد
وضيقتي فزعت خال جرحي وعمه
لكن أدعي إلهٍ فوق عرشه مجيد
وأطلب إنه يفرج كل كربه وغمه
(يمه) النوم بغيابك لعيني عنيد
والبلاوي على قاع الحشاء مدلهمه
يا غناتي وذخري يالغرام الاكيد
أعذري من كتب لك هالقصيده بدمه