البشارة

وش عاد لو بشرتني بالنصر والقلب مهزوم
من صد عذرا طيفها عندي وهي عند أمها
والرايح اللي ما يجي والطايح اللي ما يقوم
في حبها حظ معثور فرحته ما تمها
مثل العمى ما يبصر إلا في منامه بالحلوم
وإلى صحى يخطي عصاه امرار قبل يخمها
كنت احسب ان الشوق لا دام التجافي ما يدوم
لين انتهى دمع العيون وسال عقبه دمها
وبعض الرجا مهما يطول الصبر ما يقضي لزوم
صيحة خلا مهما يطول الصوت محد يمها
يا قلب انا ماقول ذم اللي مقدر ومحشوم
ليلى على جور الهوى مجنونها ما ذمها
لكن لو انك تحتكم للعقل في بعض العلوم
ما صارت اكبر همك اللي ما انت باكبر همها
خليتني في غم نفسي مندفع باقوى عزوم
والوم خلق الله وانا والله سبايب غمها