غاية الرجل

يا علي قلبي كاثراتٍ همومه
إليا سرح هم يجي ضاوي هم
زادت همومه بين ليله ويومه
وصارت هواجيسه تفرّق وتلتم
إليا خمّه الهاجوس في حلو نومه
خليت حلو النوم من شدة الخم
ولو جيت ألوم القلب وشلون ألومه
إليا صار همه حاصل من بني عم
من الرفيق اللي لزومي لزومه
اللي غدا يم وانا رحت في يم
إليا قدم يمي فرحت بقدومه
وإليا طلب مني طلب قلت له تم
أبغى رفيق ما يغير سلومه
رجل على ما قيل يَحشم ويُحشم
خطو الشجاع اللي قوية عزومه
لا يرفعه مدحِ ولا نزله ذم
الرجل تعرف غايته من علومه
وكلِ لسانه عن ضميره يترجم
الأمن سايد والبلاد محكومه
قل للمواطن في ذرا الامن ينعم
فضلِ من الله ثم فضل الحكومه
ومن كف أذاه عن المخاليق يسلم