لا متى وأنت حاير

ياهلي لو مقيم عندكم بالمكان
دوروني تراني ضايع من سنين
آه واعيني اللي عن فلان وفلان
ودها تكتم العبره وغصب تبين
وآه واقلبي اللي بدة انس وجان
كن خلوج بن رومي مورثته الحنين
والسبب همي اللي كل ما قلت هان
عود اكبر من أول في عيون الحزين
يوم شفته شباب قوه وعنفوان
عقب ما كان في بطن المقدر جنين
ما قويت الحكي وانا فصيح اللسان
قبل تقطع سكاتي قولة الله يعين
كانت احلام عمري من قديم الزمان
تحسب ان الليالي تمهل الحالمين
كانت اول تراهني عليها رهان
بس ما كانت الا في ضلال مبين
ليتني في ظنوني ما رفعت الطمان
قبل احط الثقه غرس على غير طين
احسب اني على عهد من الله وامان
لين شفت الامانه ما تلوت بأمين
يا ضميري بعد غش تجلا وبان
لا متى وانت حاير بين شك ويقين
طلة الشمس من دون الستر للعيان
ما تغر الغبي حتى تغر الفطين
بس قدام تعذل خاين يوم خان
اعذل اللي وثق فيه وبسط له يمين
اكذب من الشجاعه في كلام الجبان
بشة في قبالك من عبوس الكنين