انتظرتك

في طريق الصمت ودموعي كلامي
جالسه في ليل موحش في زوايا موجعه
تعبت عيوني تدور عن بعض نور بظلامي
ما لقيت إلا سواد يشتكي لي واسمعه
انتظرتك لين ملت لهفتي رجفة عظامي
انتظرتك كني اللي ينتظر له مصرعه
انتظرتك وادري اني بنتظر باقي حطامي
وشهو باقي من سفينه دون مرسى واشرعه
انتظرتك لين ادمت صرختي جرح انهزامي
وألبست بيض الأماني من سواد الأقنعة
عشت أنا بكذبك سنين وكنت أصدق بك غرامي
كلما تخلف وعدنا قلت أنا عذره معه
من ثمان سنين ووعدك كل سنة يشحذك ظامي
كل سنة موعد جروحك بالدموع أشمعه
مدري هو ذنبي وفايه وإلا ذنبي هو هيامي
وإلا ذنبي قلبي اللي كل مره تخدعه
ملت خطاي المساري بين همي واهتمامي
بين حلمي اللي نزعت وحلم توي أزرعه
صاحبي ما عاد ينفع لا عتاب ولا ملامي
تدّعى الشوق وخفوقك ضايع بالمعمعه
صاحبي ابعد واببعد هذا هو آخر كلامي
يا تصون الوعد وإلا كذب حبك ودّعه