العيد عاد

وعادة العيد لاعاد
يجمع قلوب أهل الوفا يا اجمل الخود
الناس يوم العيد في ود وإسعاد
وانا حزين وفكري اليوم مشدود
مالي جدا غير التعب والتوجاد
اسهر وأهل الدمع والعالم ارقود
ياللي رحلت بعيد من غير ميعاد
الله يعين القلب يا ناعم العود
اسقيتني مرّك وأنا ظامي وداد
تركتني بين التناهيد ولهود
صبرت صبر أيوب والصبر ما فاد
طال انتظاري بالأمل وانت مفقود
ما يذبح العاشق سوى جرح الأبعاد
وانته حبيبي تذبح القلب بصدود
جرح العنا من واهج الشوق يزداد
ليتك تجرب قسوة البعد بحدود
متى تقر العيون وتزول الأنكاد
وافرح أنا بلقياك يا نفحة النود
أرجوك لا تفرّح عذولٍ وحساد
وتخون يا عمري مواثيق وعهود
راح العمر وش عاد وش عاد وش عاد
مشتاق لعيونك عسى أيامك تعود
روحي تبيك وخاطري فيك منقاد
يا روح روحي نوِّر أيامي السود
تعال في شوفك مسرات وأعياد
تعال دام الشوق في القلب موجود
حسن بن علي الهاجري /دولة الكويت