سلطان الخير

يا قصيدي ودي انك مثل صرف الذهب
يوم ظني فيك ما ني ليا احتجتك هزيل
يا قصيدي ساع من حان لك وقت الطلب
والثناء والشكر للي على خلقه كفيل
أحمد الله عد ما لاح برقا يلتهب
أحمد الله عد ما سال سيلا مع مسيل
جيت أهني بالسلامة لحلَّال الكرب
الشجاع ابن الشجاع الأصيل ابن الأصيل
الله يفكك من الباس فكاك النشب
العظيم الخالق الرازق الرب الجليل
يوم قالوا جيت طيب ولا تشكي تعب
عادت الفرحة كما شربة من سلسبيل
نجد تفرح بك وتطرب وكلا لك طرب
شعبك يحييك في في كل يوم وكل ليل
منجذب من راس حاكم ليا قيل انجذب
مستحيل أحداً يسوي سواته مستحيل
لا نواله جمع وصله لا يمكن ينسحب
أبو تركي راعي الافعال والعقل الثقيل
عز حكمه والمهند يجب الروس جب
ما مشى إلا بالشريعة دليل أبرك دليل
ما معه غير النشاما مدفنة الركب
والذلول اللي على جنبها زاد وصميل
والصحاري ما بها غير قيظ يلتهب
لين وحدها عن العنجهية بالفتيل
رافع يدينه لنصرا موزر مطلب
السفينة قادها لا توقف لا تميل
كل واحد يرقد آمن ترى الأمن استتب
يا اله احفظهم بحفظك هدونا للسبيل
عارفين صقورنا ما يهم ابو حقب
مارقا يذبل وناساً تطبل له ذبيل
خاب من ضيع لدينه عن الحق انقلب
بنس للإرهاب عاش الوطن رغم العليل
للوطن حساد بجنوبهم بان الجرب
ليت من يسمح لنا لين تغسلهم غسيل
الشنب منكم يعادل ثمانمية شنب
يا هل التوحيد ظلا على العالم ظليل
الرجال اللي ولو نجد بالسيف الحدب
يرعف بدما يخلي معاديهم ذليل
أنت من روس الرياجيل حكام العرب
محتمين العرض والأرض بالباع الطويل
انت يا سلطان رجل الحب رجل النسب
من جدود ومن خوالا كما السيف الصقيل
مشتهر بالعرف والطيب يا الصدر الرحب
لو نطوف الكون سلطان ما مثله بديل
لقبوك الخير يامير تلقيب انكتب
بالذهب مكتوب فقلوبنا ما يستقيل
اللقب من بين الألقاب حيه من لقب
بينك وبين الردي بالوفاء مليون ميل
يا سلطان الخير محبوب من شعبك تحب
يا سلطان الخير والله ما نلقى لك مثيل
يا سلطان الخير معروف ما تلحق عتب
يا سلطان الخير للناس جيلا بعد جيل
لن مدحتك يا بو خالد ترى مدحي وجب
ان تلمس للحقايق وللعلم الجزيل
باسطا يمناك وقت الشدايد ما تحسب
ما تحسب اللي تمده كثير ولا قليل
كاسبا كلمة نعم عشت يا شيخا كسب
والثناء والجود دايم لكساب الجميل
والكرم وهبه وربي بطيبك لك وهب
في زمانك لامعا مثلما يلمع سهيل