عاد سلطان القلوب

يا هلا باللي قدومه مثل همال السحابه
يوم نور البرق عانق للمزون العقربيه
ويا هلا باللي حضوره بدد لوحشة غيابه
بعد ما طول غيابه.. جيته عن كل جيه
ويا هلا بالقايد اللي شوفته عز ومهابه
نورت فيه البلاد.. وفرحت الناس بمجيه
عاد سلطان القلوب.. وفزت حروف الكتابه
والمشاعر ما توقيها الحروف الأبجدية
الفرح عم بوصوله من شمال حدود طابه
فرحة يسمع صداها في جبال أبها البهيه
والغلا من شرق دولتنا هبوب الشرق جابه
وفزت لشوفه قلوب من وراء بيوت الحويه
السعد لاحت بروقه.. وانجلت سحب الرتابه
عانقوه أهل الحجاز وضمته نجد العذيه
ضجة أطراف الجزيره في هلا يا مرحبابه
وامتزج مع عودها الأزرق مشاعرها الوفيه
أوقفت له صدق وحضنته على صدر الرحابه
الولاء من طبع أهلها والوفاء فيهم سجيه
البشاير في قدوم الخير ما فيها غرابه
الكرم سلطان روحه.. سيرته ما هي خفيه
فرحة المضيوم لا ضامه زمانه وانتخابه
يفرج هموم الحزين ويسعد النفس الشقيه
يوم بعض الناس بالأشكال والأسماء تشابه
السحاب أن هل وبله يشبه الكف النديه
لا نخاه اللي ضلوعه كنها قوس الربابه
باروا الأصحاب فيه وصارت عزومه رديه
حالته ما بين هم وغم.. وديون وكآبه
ضاقت الدنيا عليه.. وهمه أكبر من طميه
قبل ما ينطق لسانه في محياه الإجابه
للعطاء حجاجه ضحوك ويعطي بنفس رضيه
الوكاد أن أبو خالد بالكرم ما ينحكا به
ما وراء قوله كلام ولا وراء جوده عطيه
ما يحيط بوصف جوده لا قصيد ولا خطابه
له مع الأمجاد والأجواد قصة سرمديه
نحمد الشافي شفاه وزاد ربي في ثوابه
يا عسى عمره مديد ويا عسى أيامه هنيه
سقت له وضح القصائد لينوصلت عند بابه
يا عسى سلطان رمز الجود يقبلها هديه