لا تجي

لا والله الا لا تجي والعلم خذ علمٍ وكاد
حبك تلاشى وانتهى والأفضل انك ما تعود
لا لا تحاول ما بقى بالقلب لك ذرة وداد
ياللي رحلت وكن مالي بالوجود اية وجود
ما ينفع التسديد لا فاتت مواعيد السداد
قطع فواتير الوفا واحرق ملفات الوعود
ما هي علوم السندباد وشهريار وشهرزاد
ما للجحود اليوم عندي يا جحود الا الجحود
امشي على وضح النقا المجرود واحب الحياد
ولا اداني انصاف الحلول ابداً ولا اخون العهود
صابر على ضيم الدهر واجاهد ايامي جهاد
والعمر ينقص والليال السود ما تنقص تزود
ما يندمل جرح البياض اليا دنا منه السواد
ولا تطيب العلة اللي بين بيض وبين سود
كنت اتبعك حافي قدم وامشي على جمر وكداد
سلك الحرير يقودني ويسوقني ذعذاع نود
وتعبت انادي يا حياة الروح يا كل المراد
ومليت اقول اليوم والا باكر بوصلك تجود
اسهر على ذكراك وعيوني مطاولها السهاد
وسهيل والويل وسواد الليل يا ظالم شهود
صدك ذبحني والجفا قطاع معاليق الفواد
ياللي بتعذيبي تماديت وتجاوزت الحدود
عذبت قلبي واضطهدت الشوق بالهجر اضطهاد
ليت الغلا مات ودفنته في جراهيد الصدود
لا لا تبرر موقفك واعلن على الحب الحداد
وترى البكا ما ينفع الميت ولا لطم الخدود
الحب شوق وجاذبية وانقياد بلا قياد
وصدق ووفا واخذ وعطا ما له حدود ولا قيود
وكل على ما قيل يلقى ما زرع يوم الحصاد
واكيد من تزرع يمينه شوك ما يقطف ورود
واليوم لا منك بغيت العلم خذ علمٍ وكاد
حبك تلاشي وانتهى وان طعت شوري ما تعود