التغلي

يا عين جودي وأزرق الدمع هاتي
دمعٍ غزيرٍ يجرح الخد مسفوك
من صاحب حرم عليك المباتي
خلاك عقب الورد يلعب بك الشوك
خلا حياتي ما عليها حلاتي
كني سجين داخل السجن متروك
يلعب على قلبي ضبي الفلاتي
خلا فؤادي من محبته مشبوك
خلٍ تغلى قال مافات ماتي
انسى الليالي الماضيه كلها أرجوك
يا بنت حبك شاغل كل ذاتي
وأنا عليك أشفق من أخوك وأبوك
يفداك من لبس الغطا والعباتي
كل العذارى والمزايين يفدوك
فيك الجمال وكامل بالصفاتي
وان جيت من بين المزايين حيوك
شوف العذارى كلهن واقفاتي
على جمالٍ بك وحسنك يهنوك
إن كان جالي حض في المقبلاتي
هنيت قلبي فيك.. وأقول مبروك
ما أظن به حي يسوي سواتي
أصبحت في حبك كما العبد مملوك
ما عاد تعرف ضحكتي وازعلاتي
خليتني يا زين.. تايه ومريوك
أرجوك ساعدني بحيل النجاتي
طوق النجاة اللي على الصدر مفكوك
ما أخبر قلبك قاسي كالحصاتي
ما أخبرهم في لوحة الشر حطوك
إن كان طال البعد حانت وفاتي
ويجونك أصحابك بموتي يعزوك
عبدالعزيز بن عبدالرحمن بن حفير السياري