فرح هل الزلفي وبشر أسرها

هذه القصيدة بمناسبة زيارة معالي وزير التعليم العالي لمحافظة الزلفي يوم الجمعة 29-12-1424ه
سلام كنه بالحلا در الابكار
اليا رعت من كل فيضه شجرها
سلامي ازفه وترحيبي الحار
عد المزون وعد ما امطر مطرها
يامرحبا يا اللي لنا جيت زوار
ترحيبة يطرب لها من ذكرها
حييت في ديرة هل المجد والكار
عند الرجال اللي تنامى فخرها
أهل الكرم للضيف والعز للجار
نعم الرجال اللي تطور ديرها
الزلفي تحييك ما طاير طار
وربعي هل الزلفي ترحب باثرها
يا العنقري بقدومك تحير الأشعار
وبقدومك الشعار تنظم دررها
حتى الفياض استعذبت بك للانظار
شفها عقب ما جيت نور زهرها
يا العنقري زادت بجيتك الأنوار
يا ابن الكرام اللي تنومس سيرها
يا اللي تخدم العلم في كل مضمار
باعمال وانجازات كل شكرها
وبمناسبة طلتك يا الوافي البار
منك الإشارة يا الوفي ننتظرها
مطلوبنا كلية يابن الأخيار
أومر لنا فيها وعجل خبرها
شبابنا يشكون من طول الأسفار
وكثر الحوادث زاد والله خطرها
شبابنا صاروا طعام للأخطار
بحوادث ما تنوصف من قشرها
كم راح من طالب ولا عاد للدار
وكم من مصيبه جت ولا أحد جبرها
وكم عجوز هلت الدمع مدرار
وعلى ولدها تجتلد من سهرها
أقفى ولدها الصبح والوقت غدار
ومات بسبب حادث وجاها قدرها
كله سبب بعد المسافة والاكدار
موت وشلل والبعض رجله بترها
صحيح ما نقدر على رد الاقدار
مار الليال دروس ناخذ عبرها
والأخذ بالأسباب من طبع الاحرار
ونفس الفتى ملزوم تاخذ حذرها
يا العنقري تكفى بنشرات الأخيار
فرح هل الزلفي وبشر أسرها
وقل للجميع استبشروا حلمكم صار
كلية تستاهلون انعمرها
وحنا نقول الله يكافيك الاشرار
وعساك بالجنات تقطف ثمرها
وختامها وعداد همال الأمطار
صلوا على المختار صفوة بشرها