أصاحب الطيب ولا أبغى المحاصيل

سر يا قلم واكتب حسين التماثيل
قاف به اهروجٍ اسمانٍ جزايل
انظم بيوت صنتها باحسن القيل
واقطف من اطراف المعاني مثايل
مثايلٍ تنبي وتعطي تفاصيل
من هاجس يبنى عليه الدلايل
اختار انا صحبة عديم الرجاجيل
متميز طبعه عديم الخصايل
الصاحب اللي هرجته ما بها ميل
قبل ايتهرج عارف ويش قايل
رجلٍٍ جزوم بالمواقيف حلحيل
وتشوم نفسه عن ردي الفعايل
اللي ليا صكت علي المداخيل
يصير مفتاح لكل القفايل
هذا الذي اركي عليه المحاميل
عز الله انه للثقيلات شايل
أصاحب الطيب ولا ابغى المحاصيل
الا الفعول الطيبه والطوايل
والحر يسكن في رفيع المنازيل
صيده سمين ولا يصيد الهزايل
واحذر مرافق راعي القال والقيل
راع النمايم والعلوم الفسايل
اللي مرافقته تجيب البهاذيل
ودروبه العوجى جعلها وسايل
اليوم يحكي لك بشرح وتحليل
وبكره يسولف بك ولا هوب سايل
واختم كلامي كان بالهرج تعديل
كل يقدم من خيوله اصايل