تباشير السعد

عرفتك ما عرفت الا الوله والشوق والترحال
اسافر للديار اللي بها صوتك يناديني
اضمك في حنايا الروح وامشي بك مع الاطلال
ادوّر عن بقايا حالتي في دفتر سنيني
اعيشك عمر في حاضر خيال وماضي لازال
وازورك حب مثل اول حياته يوم تغريني
تأكّد كل ما تطري على عقلي يجيه هبال
وتأكّد كل حلم في غيابك جاء يعزيني
وتأكّد لو اشوفك من بعد غيبه وصد طال
اجي ما كن لك جرّة عذاب وطعنة فيني
انا لو ما دمحت لك الخطا ماني ولد رجال
وانا ما استاهلك لو ما حضنتك في شراييني
حبيبي لو نسيت الليل الاسود ما نسيت الشال
حبيبي لو ذكرت الورد الاحمر زدت في عيني
حبيبي وش يكون العيد لولا ضحكة الاطفال
حبيبي وش يكون الحب عندي وانت ناسيني
تجيبك ذكرياتي عارض مسترسل همال
يرش اقصى معاليقي وبالاحساس يرويني
تفز له المشاعر بالغلا ومن الفرح تختال
واحس بغيمة تسقيني وشمس تدفيني
وتجيبك ذكرياتي نبض خفّاق ونشوة بال
وكفّ من تباشير السعد تاخذ وتعطيني
وصالك للمسافر حلم والاحلام نوبٍ فال
عساها تصدق احلامي وتسعد بك مياديني