اخفض جناح الذل

يا خوي عطني من علومك وابعطيك
عذب الكلام المختصر لاكتسابك
علمي ومفهومك يحدد مراويك
خذ النصيحة ينكتب لك ثوابك
بنصحك في ثنتين تجلا بلاويك
هذي عمود الدين واقرا كتابك
والثانية يومك ترا مايخليك
زودبه الصيعان واكثر زهابك
ووصيك في والديك وامرك وانهيك
بامرك في وصلك لهم بغترابك
وبنهيك في صوتك لهم في تماديك
لا تتخذ من ضيق وقتن لهابك
واخفض جناح الذل من رحمة فيك
وقله يبه تبشر وسم وهلابك
وامك تراحق الأمومه أوصيك
فيها النبي وصى ثلاث ونهابك
خذها نصيحة يوم وقتك يجاريك
قبل الندم على ضيقتك واكتئابك
لا تأمن اللي دوم يبحث خوافيك
ترا يحسب لك ولو ما بدا بك
ما يترك الفرصة اليا جيب طاريك
يدخل مداخيل الدسم في ثيابك
يرخص لك المره ويغلي حلاويك
ويسقيك من جور الزمان أو عذابك
وخلك كريم ابمنزلك يوم يلفيك
ضيفك وقدم له خضيض احتلابك
وسبق له الدله وبراد شاهيك
وقله تفضل يا هلا مرحبابك
ثم افهق الدله وقدم صوانيك
وازهم ضيوف البيت باول ندابك
واخبرك يا فارس عن اللي مواليك
اللي يعيفك الهنا مع شرابك
اللي سكن في غبتك مع مذاريك
يحريبك الحروه ويمكن نشابك
طلعه ترا مثل الورق بالمساويك
ولونه شبيهن للبرد لاكسابك
أنا أعرف ان العلم ماهو بخافيك
بس الجهل له دور باول شبابك
خذ الحقيقة والتجاوب توريك
وسود الليالي خلها في حسابك