طيور الغرام

أشوف الزين ما يسأل ولا كني على باله
ولا كنه تذكرني وتذكر ماضي أيامي
وأشوف دروبه اقفت به ولا أدري وش هي أحواله
لا أدري وينها ذيك الدروب وتاخذ اقدامي
أقول احيان في نفسي أنا مالي وهو ماله
واقول أحيان لا والله حبيبي وقبلة احلامي
أسوق خطاي واتبعها ووقف حاير داله
وأعدّي واسبق الخطوة وكن الزين قدامي
وأنادي هاجس، عاف المبيت وحالته حاله
كثر غمّه كبر همّه وجرحه نازف دامي
لنا عامين وطيور الغرام العذب رحّاله
رمت بي نعنبوها جعلها القناص والرامي
لنا عامين في رجوى زمان طول امهاله
عسى الله يحسن النية قريب والزم خطامي
لنا عامين والجرح النّدي توّه على حاله
لنا عامين والشوق الغبي في داخلي حامي
متى يفتح عيون الشوق والقى نفسي قباله
وأشوفه مثل علمي به على وقت اللقا ضامي
واشوف الزين ما يسأل ولاكني على باله
ولاكنه تذكرني وتذكر ماضي أيامي