شعبي.. ولكن

ما أودع هجوسي تردف القاف بالقاف
الا قصيدٍ في المجلات مكتوب
قصيدٍ الجوهر منه سمٍ ازعاف
على الادب لو مظهره شبه مرغوب
لو مظهره لماع ينعاف ينعاف
وشلون ماينعاف وعيوبه عيوب
ضعيف معنى هابط وساقط وجاف
والمفرده لابسةٍ الثوب مقلوب
فيه الخطأ لو تاصفه ما له اوصاف
القاف مملي بالخطا ثم مكروب
شعبي ولكن غير عن شعر الاسلاف
اللي قرايحهم تجود بعسل ذوب
ناسٍ ذهبهم بدَّل بقطن ندّاف
شعار غفله خلو الشعر مسلوب
هويّته ضاعت تولوه الاحلاف
ماعاد له قيمة بعد كان محسوب
وانا ما ألوم شويعرٍ فيه خفخاف
ألوم كل محررٍ يقضي النوب
وشلون ماينصف مع الشاعر انصاف
ويوجّهه ويفّهمه بألطف اسلوب
وشلون ينشر شعرٍ اسنينه عجاف
وشلون يرضى يصبح الشعر منكوب
وشلون يتحمل خطأ كل مزهاف
وشلون مايخشى الولي قابل التوب
وشلون مايضفي على الصفحة لحاف
ولاّ يجنّبها ليا صار مغلوب
وانتم يا شعارٍ تعدون عراف
ولكم قصيدٍ يوقظ قلوب وقلوب
الشعر ينخاكم بعد شاف ما شاف
شكواه ينقلها هواء كل نبنوب
ان كان ما كلٍ بدر منه ميقاف
ولا ترى شعر النبط مات معطوب