بين الهجر والمواصل

بكتب قصيده ودمع العين يسبقني
وهجوس قلبي على الطاروق فزاعه
يا زين أعشقك وبحر الشعر يعشقني
وأنا أعشق الشعر لجلك واعرف أسناعه
لك صورةٍ في خيالي ما تفارقني
على مدار أربع وعشرين ذا ساعه
نار الغلا في صميم القلب تحرقني
تطفي وتالع ولا تحتاج ولاّعه
يا زين في بحر حبك ليش تغرقني
رميتني في بحور مالها قاعه
عاقل وكني مراهق وانت ترهقني
تامر وانا أقول تم السمع وطاعه
لكن أبرجوك حذرا لا توهقني
بابور حبي وحبك جود شراعه
بيني وبينك عهد وشلون تسرقني
سرقت قلبي وخله عندك اوداعه
صدقني إنك ملكت القلب صدقني
ادواه عندك وعندك سبت أوجاعه
بين الهجر والمواصل لا تعلقني
الوقت بيني وبينك طق باصباعه