نسيان ما فات

يا الي تطالبني بنسيان ما فات
ما فات صعب اوصف هناه وضياعه
الي مضى آلام وجروح وآهات
واللي بقى يرهب مجرد سماعه
مسكين قلبي عاش وسط المعاناة
حتى زمان الهم يرفض وداعه
أوقات أزفّ الحب للناس واوقات
أنزف مشاعر ودّ في كل ساعه
ناديت للطيبة وسطَّرت بابيات
محدٍ رحم قلبي بكثر التياعه
مرَّات أحس بنزع روحي ومرات
احس كل الكون يعلن ضياعه
في داخلي صوت الشَّقا حي مامات
يحجب عن الفرحه ويبسط شراعه
يا الي اشوفك نور بأعماق مآسات
ترى العنا طول وزاد اندفاعه
حالت عن وصولك ظروف ومسافات
والعجز قيَّدني ولا اقدر نزاعه
يا ليتني محسوب من بين الاموات
قبل الصديق يطيح عنه قناعه
قبل اشرب الآلام وأصرخ بالأصوات
قبل اكتشف زيفه وكثرة خداعه
ما عاد ينفع فيك كثر الحسوفات
قلبي عن العالم بيعلن وداعه