الخوة مع طيب الناس

يا ما حلا الخوة مع طيب الناس
دايم خوية ينفعه ما يضرّه
يفرح لي شافه سليم من الباس
وان غاب ينشد عنه والا يمرّه
هذا هو اللي خوته ترفع الراس
والطيب مع مثله يزيدك مسرّه
يحفظ خويه من المتالف والادناس
ولا هوب في كل المشاكل يجرّه
مثل البحر غزير ما هوب ينقاس
ما أحد عرف خافي علومه وسرّه
وأما الردي صداقته هم وافلاس
أفضل تجانبه بخيره وشرّه
بارد ومعدوم المشاعر والاحساس
وفي اللحظة الصعبة سريعٍ مفرّه
والرجل من طبعه له المجد نبراس
يصبر على دنياه حلوه ومرّه
خلف بن عبدالله العلياني / شواص