شمس تشرق بالظلام

أنتخيت حروف عزٍ جت من العليا تشيل
الخجل زود المهابة زلزلت كل الأنام
القلم هز الأنامل سيدي الله وكيل
قلت ابهزم كل شاعر جيت كلي بانهزام
ضج في وصفك حديث الشعر لين الصبح ليل
بنتك وتمدح أبوها. وبنت حاتم ما تلام
رفعت الأقلام حبره والورق جف الهميل
وشابت حروف القصايد ولاتوفي بالتمام
لو الكرم يا سيدي يتجسد الدنيا تميل
لين حاتم يحتويها وأنت بالشده حزام
إيه نعم «سلطان هيبه» كيف ماصير الهبيل
واتلعثم في قصيدي. واحتضر وقت الكلام
سيدي «قصة حماية» رددوها بالخليل
يوم صاحت من يهود.. واحتمت بأرضه سلام
من سمع صوت الأرامل. «وبالكفن» حرٍ أصيل
ينطق بصوت الشهادة وانتشلته من زحام
سيدي «سلطان ايه» نسأل الله أن يطيل
عمر أبو خالد ودامت له سنين العز ودام
نوخت كل القوافي ولابقى بالبدر حيل
والحبر جف ورويته دم واشتد اللثام
ياهلا وجه الصيام هَلْ كياد البخيل
لاح سلطان وسجدت الفين من عقب الأمام
احمد اللي خالقه واتهول وعندي دليل
واستغفر اللي جابني بنته وعديت الملا م
شيخ شيخ وأب أب مطوع الراس الهبيل
يا وسع باله وفاله بسمةٍ تجلي العتام
يا كبر قلبه نحبه عذرنا ماله مثيل
ذاك سلطان ودعينا في صلاة وفي قيام
سيدي سم الصعاب اللي يساب السلسبيل
طلتك مسح الذنوب وشوفتك مسك الختام
سيدي يوم العطايا في يدين المستحيل
عندك اكبر من خفوق ما سكن غيرك حرام
الله يحب الجمال واشهد انك بالجميل
لك على رؤوس المزايا شمس تشرق بالظلام
كيف لا وأنت السنافي اللي مسح دمعٍ يسيل
يوم أنا سرب الهموم وطرت بأحزاني حمام
وليه ياحضن اليتامى والعدامى ما نميل
و ننحني ونقوم طاعة بالولاء والاحترام
سيدي لك صوت ساكن بلسم الجرح العليل
من زرعته بالمسامع نلت من قلبك وسام
سيدي لك كلمتين نفح ورد.. وريح هيل
ولك ثلاثة سطور عندي بسمتك نور البهام
سيرتك هي جل فرح ومقدمك خيل وصهيل
بيرق العز ورفعت بجيتك كل العلام
حظ حظك يا الجزيره مالك الملك الجليل..
من عطاك الفخر ربي حطك بأعلى مقام
ارفعي للمجد رايه ارقصي حره تميل
حاتم الطائي كريم وسيدي نسل الكرام