سقى الله روضة التنهات روضة كاسب الطولات بسيلٍ في عروض العرق الأعلى بانت حدوده من خشوم السحاب اللي من المنشأ يجي زافات سحابٍ يرتدم والبرق فيه يسابق رعوده اليا هلت هماليله وغثو الأرض زل وفات بعد مده تشوف النبت كله تزهر وروده تحصل روضة التنهات زامي نبتها بالذات يعانقها السحاب معانقه بالصيف للسوده وتطيب بطيب من طيبه يفرج ضيقة الشدات حكيم الرأي في يومٍ به الأعصاب مشدوده اليا حل بجوانبها تجمل بأجمل الأوقات شذا ريح الخزامي والنفل يزدان بوجوده حبيب الشعب ساس الجود لا راحت علوم وجات عليه آمال شعبه في قسا الأيام معقوده خدم دين ووطن بإخلاص وافي وأحسن النيات ونهض بالمملكة بأحلك زمن ما باحت سدوده وطورها وخلا في سماها ترفع الرايات وصارت درةٍ من كل قطر وصوب محسوده بذل جهده وفي وقتٍ قياسي حقق الغايات حليف الجود له يمناً بفعل الخير ممدوده عسى عمره طويل ودام عزه راعي النخوات وريث المجد نبراس العلا ما كلت جهوده أبو فيصل زعيم العرب له بين العرب وقفات اليا حمي الوطيس وقام كلٍ يقدح زنوده مواقيفه عليها لو يطولن الليال إثبات اليا شان الزمان وكل خصمٍ جمع حشوده يغيث المستغيث وينقذ المسلم من النكبات ويجير المستجير وباللقا ما ينقض عهوده على الله يعتمد جل وتعالى منزل الآيات إله نصره أقرب للموحد من هوى نوده
