اطيور شلوى

ابتدي باسم الله اللي لا ظلال غير ظله
رب خلق ارواحهم له بالنهاية سلموها
يا هل المقناص درب القنص نفسي ما تمله
ابدوي شف بالي صيدةٍ ما دوروها
جهزولي عزبتي والدرب اعرفه واستدله
كملوها يالنشاما ون نقص شيء الحقوها
وهاتوا الفكس آر وابغى جيب شاص امرافقٍ له
والقنوص اطيور شلوى والعوايد جودوها
والجهة خط وطى يبرين مجنب لين زله
مع جراهيدٍ هل المقناص قبلي ما وطوها
ومع غروب الشمس ناقف والخواطر مسفهله
ومن ميابيس الغضا للنار شبوا واوقدوها
ثم قام احد القروم وحاف لهل الكيف دله
دلةٍ فناجلها يجلي التعب ون قدموها
وبعدها كلٍ يقول الدور عندي وانت خله
والذبيحة في ثواني بالفراسن علقوها
وبتدا ليل التسامر وانتقي من الهرج جله
السوالف تحت نجم الليل والدلة ثنوها
هرج ذرب وكل رجال كلامه فاطن له
العلوم الطيبة معها القصايد وردوها
ومع مغابيش الصباح العفش رتب في محله
وبتدا المقناص والشمغ النشاما حذفوها
ساعتين وكل واحد جايبٍ صيده يشله
كلمة ابشر بالشبب يا حيهم تباشروها
ذي امناتي والرشا كلٍ على كيفه يتله
والسلع لولا اختلاف الراي يمكن بوروها
والهواية تختلف والناس كلٍ عاش مله
والصقور اللي ما هم عرافها قالوا شووها
ويصلاة الله على المختار وضاح الادله
عد حجاجٍ نووا مكه ولبوا ودخلوها